تصوير الماكرو أو الميكرو أو الكلوس أب وهو من أصعب أنواع التصوير واللى محتاج صبر وجهد عالى جدا من المصور عشان يطلع بصورة حلوة وده نوع من التصوير بيهتم فيه المصور بإظهار حاجات ما بنشوفهاش بعنينا المجردة زى تصوير الحشرات والكائنات الدقيقة أو حتى تفاصيل صغيرة فى الورود أو العين أو.. أو .. أو .. إلخ
عشان أوصلكم الصورة فى مرة كنت فى ورشة ماكرو صورت 597 صورة طلعت منهم 5 والباقى اتمسحوا عادى جدا :) - - بداية لازم نبقى عارفين إن الماكرو بيعتمد على تكبير التكوين اللى بنصورة من خلال أكتر من طريقة هنشرحهم هنا بإذن الله - كمان لازم نتاكد من توفر إضاءة كافيه فى تصوير الماكرو عشان يظهر تفاصيل الجسم بصورة كويسة لإننا بنستخدم شاتر عالى ..
أول حاجة معدات التصوير
الماكرو زيه زى تصوير أى حاجة تانية بيتصور بمعدات احترافية متخصصة ( عدسة ماكرو - توين فلاش - فلاتر كلوس أب )
لكن بما إن المعدات دى بيبقى ثمنها غالى جدا ..مثال عدسة الماكرو بتعدى ال 8 آلاف جنية .. العدسة فقط فبنعمل حاجة إسمها حل بديل عشان نقدر نصور وفى نفس الوقت نوفر الفلوس الكتير دى على نفسنا ( مع التضحية بجزء من الجودة )
ينفع تصور ماكرو بإية ؟-
أى كاميرا او موبايل فى اوبشن تصوير الماكرو يصور ماكرو عادى -أه والله زمبئولك كده - بس هيفرق فى الجودة ومستوى التكبير والكلوس أب اللى فيه ...
كاميرات الموبايل :
لو كاميرا موبايلك فيها أوبشن التحكم فى الفوكس اختار Macro Focus واعمل زووم 2 اكس او 3 اكس مثلا عشان التكبير وعيش مع التصوير ..موبايلات الاندرويد فيها حاجة اسمها Scene mode اختار منها Autumn color mode . .. واعمل زووم شوية برده وبعدين ابتدى صور
الكاميرات الديجيتال والسيمى برو
إختار وضع تصوير الماكرو وهتلاقى مكتوب على العدسة أقل فوكال ديستانس ودى أقرب مسافة تقدر تقرب من التكوين فيها وانت بتصوره ...برده لازم تستخدم الزووم بس تراعى انك ما تستخدمش الديجيتال زووم
كاميرات ال DSLR
وده اللى هنتكلم عليه أكتر عشان هو أفضل طريقة عشان نخرج صور ماكرو ..ركزوا معايا شوية بقى .. بشكل عام كل العدسات بيبقى فيها حاجة إسمها فوكال ديستانس (يعنى بعد بؤرى - المسافة بين السينسور والتكوين ) ودى أقل مسافة الكاميرا تقدر تقرب من التكوين اللى انت بتصوره وتعمل فوكس منها ..بمعنى إن لو قربت من التكوين اكتر من كده الصورة مش هتبقى جوه الفوكس , والطرق اللى هنشرحها كلها بتحاول تتغلب على الموضوع ده
للتوضيح اللى على الشمال ده اقل بعد بؤرى الكاميرا تجيبه واللى على اليمين حلول الماكرو
- أول طريقة ودى الأغلى والأريح تجيب عدسة ماكرو وفلاتر كلوس أب .
ثانى طريقة : الاكستنشن تيوب والبيلوس extention tube & Bellows
البيلوس Bellows
ثالت طريقة : فلاتر الكلوس أب Close Up Filters
الفرق ما بين فلاتر الكلوس أب والتيوبس فى الصورة دى
رابع طريقة : التيلى كونفيرترس TeleConverters
ودى عبارة عن عدسات تيلى بتركب على الكاميرا عشان تزود قوة التكبير والتقريب اللى فيها
خامس طريقة : قلب العدسة :Reversed Lens
فكرة العدسات انها بتجمع الصورة اللى شايفاها وتصغرها عشان تدخل تتسجل على السينسور بحجم الصغير ده وبالتالى لما بنركب العدسة مقلوبة بتعكس وظيفتها فتكبر الصورة بدل ما تصغرها ..كل ما العدسة تبقى أعرض كل ما تبقى قوة التكبير أكتر يعنى لو معاك عدسة 18-55 قوة تكبير العدسة وهى على ال 18 أكبر بكتير من قوتها على ال 55 ..كل شركة بتتعامل مع العدسة بطريقة ..كانون مثلا لما بتفك العدسة بتتفتح على الأخر على عكس نيكون وسونى بتتقفل العدسة على الأخر .تقدر تتحكم فى فتحة العدسة الكانون عن طريق زرار اسمه DOF موجود فى أغلب الكاميرات بتدوس عليه وانت بتفك العدسة بعد ما تكون ظبطت الاعدادات اللى انت عايزها .اما النيكون والسونى فهتلاقى زرار موجود فى العدسة من ورا بعد ما تفكها بتحركه لحد ما تلاقى فتحة العدسة مناسبة وبعدين تثبتها بأى حاجة قبل ما تركبها ...كل الشركات بقت بتصنع حاجة اسمعا ريفيرس رينج Revere Ring وده وظيفته انه بيمكنك تركب العدسة فى الكاميرا بالمقلوب بدل ما تمسكها بإيدك ودى صورته .
سادسا الصور المركبة Image stacking
ودى بقى المصور بياخد أكتر من صورة مكبرة بصورة كبيرة للتكوين اللى بيبقى عايز يصوره كل مرة يكون الفوكس على جزر منه -ولإن كل ما بنكبر كل ما عمق الميدان يقل - ..وبيركب الصور دى ببرامج الفوتوستاكنج عشان تطلع صورة واحدة مثال الصورة دى
ختاما لازم تركز أوى وانت بتصور ماكرو فى الفوكس انه يبقى على أهم جزء فى التكوين اللى انت بتصوره لو حشرة يبقى عنيها ولو زهرة يبقى الجزء اللى انت عايزة وما تزهقش ولا تمل وعلى فكرة أول مرة هتصور فيها ماكرو ممكن ما تطلعش ولا صورة كويسة عادى ..
إرسال تعليق
التعليق الذي يحتوي على تجريح أو إتهامات لأشخاص أو مؤسسات لا ينشر ونرجو من الأخوة القراء توخي الموضوعية والنقد البناء من أجل حوار هادف